Feliz Día das Letras!

Aínda que foi o pasado xoves, non queremos deixar de falar sobre o que foi a I Quedada literaria de Vigo e bisbarra na que participaron os CEIP Emilia Pardo Bazán, Ría de Vigo, Carrasqueira, O Pombal, Santa Mariña de Redondela, Frian, o IES do Castro e os membros do club de lectura do noso centro. Unha xuntanza para compartir libros, a lingua que nos une e facer algunha que outra amizade, propiciada por Antonio Fernández, responsable da biblioteca do CIFP Manuel Antonio e Marta, do servizo de Normalización Lingüística de Vigo e a colaboración dos responsables de bibliotecas escolares e da BM de Redondela.

A primeira hora da mañá, os centros distribuíronse polo parque de Castrelos segundo as idades dos rapaces para compartir un tempo de lectura silenciosa, logo compartida en parellas e por último, intercambiar as recomendacións que fixemos para agasallar, en forma de marcapáxinas. Tamén tivemos un rato para xogar ao "teléfono escacharrado" a partir dos inicios de capítulos dos libros.

Falaron das súas lecturas favoritas entre eles e tamén, para os informativos rexionais, momento que aproveitou  a nosa alumna Tamara para defender unha educación non sexista a propósito da súa recomendación de Penúltimas Tendencias de Carlos Negro.

Despois deste tempo para coñecerse, chegaron as actuacións dos rapaces aos pés do Museo Quiñones León, con Uxía Blanco como mestra de cerimonias. Entrañable a implicación dos máis cativos e a seriedade con que fixeron as representacións dos contos, poesías e cancións que traían preparadas para mostrar.

Pola nosa banda, as dúas Tamaras do club de lectura de 4º e 1º Bacharelato leron o diálogo de  "Na oficina de obxectos perdidos" de Made in Galiza de Séchu Sende.

Agora, a esperar a xuntanza do curso que ven, como dicían os nosos rapaces, despois de corear o " En galego, xa si!" de Migallas que cantaron os nenos do CEIP de Santa Mariña de Redondela durante a viaxe de regreso a O Porriño