Lemos a novela Mentira, de Care Santos, e con ela, ademais de gozar dunha problemática historia de amor entre unha moza e un mozo pertencentes a mundos opostos, comprobamos o enganosas que poden chegar a ser as redes sociais. Ademais, esta novela levounos a falar dun
clásico da narrativa estadounidense, O gardián entre o centeo, de JD Salinger, e unha das nosas lectoras devorouna! Aquí podedes ver unha foto do breakout que resolveron por equipos os nosos lectores/as para ir sumando puntos na súa competición.
A seguinte lectura foi O curioso incidente do can á medianoite, de Mark Haddon, un exitazo internacional que nos permitiu entender mellor que é o Trastorno do Espectro Autista grazas ao seu protagonista, Cristopher, un peculiar detective e un auténtico xenio das matemáticas. De feito, nunha das probas que debían superar os equipos do club de lectura había un enigma matemático. A ver quen o descobre: “Como podemos facer que catro noves dean como
resultado cen?”.
E agora imos a polo noso terceiro libro, A parte dos anxos, unha colección de microrrelatos de Emma Pedreira ilustrado por Carlos Lago… Carlos Lago? Sóavos? É o que ten contar cun artista no insti! Si, é o profe, o noso Juanca! Así que teremos o privilexio de contar con el na nosa tertulia
para afondar neste libro á vez fermoso e lúgubre, escuro e lírico, de debuxos e palabras inquedantes que nos acercan cun sorriso doloroso pero terapéutico á traxedia das mortes prematuras, vidas cercenadas na más tenra infancia.
Texto: David
No hay comentarios:
Publicar un comentario